स्वातंत्र्यवीर सावरकर स्मारक: राष्ट्राला अर्पण सोहळ्याची आठवण

स्वातंत्र्यवीर सावरकर स्मारक: राष्ट्राला अर्पण सोहळ्याची आठवण

भगूर हे इतिहासाच्या पानांत अमर झालेले ठिकाण. याच ठिकाणी भारताच्या स्वातंत्र्यलढ्यातील एक महान क्रांतीकारक आणि विचारवंत स्वातंत्र्यवीर विनायक दामोदर सावरकर यांचा जन्म झाला. त्यांच्या सन्मानार्थ उभारण्यात आलेल्या भगूर येथील सावरकर स्मारकाचा उद्घाटन सोहळा दि २८ मे १९९८ भारतीय इतिहासातील एक महत्त्वपूर्ण क्षण ठरला.

स्मारक राष्ट्राला अर्पण करताना महाराष्ट्र राज्याचे तत्कालीन मुख्यमंत्री मनोहर जोशी यांनी दीप प्रज्वलन करून सोहळ्याची सुरुवात केली. या प्रसंगी सावरकर कुटुंबीयांची उपस्थिती होती. सौ. स्वामिनी विक्रम सावरकर, सौ. सुंदरा विश्वास सावरकर यांच्यासह सावरकरांचे नातेवाईक आणि विचारधारेचे अनुयायीही उपस्थित होते.

राजकीय नेत्यांमध्ये नामदार प्रमोद नवलकर, उपमुख्यमंत्री गोपीनाथ मुंडे, विश्वासराव सावरकर, नामदार अनिल देशमुख, आणि दत्ताजी साळवी यांनीही स्मारकाच्या महत्त्वावर प्रकाश टाकला. डॉ. अशोक मोडक यांनी सावरकरांच्या विचारधारेचे महत्व अधोरेखित केले. पुरातत्व विभागाचे संचालक के. दे. कावडकर यांनी स्मारकाचे ऐतिहासिक आणि सांस्कृतिक महत्त्व उलगडले.

या प्रसंगी उपस्थित असलेल्या प्रत्येकाने स्वातंत्र्यवीर सावरकरांच्या कार्याचा आणि विचारांचा पुनःप्रत्यय घेतला. हे स्मारक फक्त त्यांच्या स्मृतींना आदरांजली नाही, तर त्यांच्या प्रेरणादायी विचारांचे प्रतीक म्हणूनही उभे राहिले. भगूरमधील हे स्मारक प्रत्येक देशभक्तासाठी प्रेरणेचा स्त्रोत आहे, आणि सावरकरांच्या जीवनकार्याचे तेजस्वी दर्शन घडवणारे स्थान आहे.

हा क्षण इतिहासात सुवर्णाक्षरांनी लिहिला गेला आहे, आणि तो प्रत्येक भारतीयासाठी अभिमानाचा ठरतो.

✍️ श्री मनोज बंडोपंत कुवर

भगूर नाशिक